إبني الشهيد
***************
يا رصاص الغدر ليه بتحصد كل يوم منا الكتير
يا رصاصة الغدر إبني كان شجاع ، طيب ، أمير
كان لما حد بيسأله تتمنى إيه كان يقول أبقى شهيد
كنت بحسب إن إبني فاكر إن الحرب لسه
ومكانش يعرف إن عمره هينتهي بإرهاب خسيس
وكنت بحلم ييجي يوم ألقاه عريس
علشان ميبقالي سند في دنيتي وكمان ونيس
ومكنتش أعرف إن عمره هينتهي بإرهاب خسيس
بس ليه الدم في بلادنا أصبح رخيص
من غير تمن بيقطفوه فـ عمر الزهور
وكل واحد مننا في أي لحظه يروح فطيص
ماهو خلاص الدم في بلادنا أصبح رخيص
كنت دايماً بسمعه فـ صلاته دايماً يعيد
كان لما يسجد أسمعه بيقول شهيد
وفـ كل سجده أسمعه يقعد يعيد كلمة شهيد
كنت مبرضاش أسأله عنها لأني عارف
إن إبني وقت الجد بيفوت في الحديد
كنت حاسس بيه وأنا بتطلع في وشه ساعة السلام
كانت عِنيه بتلف في البيت وعمالة بتقول كلام
لما مسك إيدي ما كان ماسكها زي كل مرة بالتمام
ولما إيده جت فـ إيدي عشان يسلم تاه الكلام
نادى لأمه قالها ضميني في حضنك
وقال لأخته يا رب يوم فرحك تلاقيني جنبك
باااس إيديا وقاللي يا با إوعى تزعل مني
وطى على رجل أمه باسها وقالها قلبك حاضني
ضم أخته وحط إيده على شعرها وقال سلاااااام
وقتها سكت الكلام وخطف إيده مننا وجري أوام
************************************
وسافر إبني ، سافر حبيبي سافر ضنايا
سافر اللي كان سندي وكان ضلي وكان غطايا
سافر إللي كل لحظه قضاها من عمره معايا
سافر إللي ما سابني لحظة في صحتي ولا فـ عيايا
سافر إللي مكنتش أعرف إن دي آخر لحظه فـ حياته معايا
سافر وساب زوايا البيت وهي بتدور عليه
سافر وساب قلوبنا كلنا مشغولة بيه
طب قولولي بس إبني يعمل إيه
وإللي عمله ده كان من الواجب عليه
دا كان بيحب بلده أكتر من عنيه
كان عنده في البيت عَلَم بيتَحي فيه
ساعة ما يدخل ولَّا يخرج لازم يقف يِدِّي التحية لِيه
بيكلم العَلم يقوله إنت حته من قماش
بس قوللي إنت واخد قلبي مني ليه
رُد يا عَلم وقوللي إنت إيه
كنت حاسس إن إبني هييجي يوم يتلف بيه
كلميني يا رصاصة الغدر وطمنيني عـ الشهيد
دخلتي قلبه من قُرَيب ولا جيتي من بعيد
إيه إللي ضنايا قاله لما دخلتي قلبه
كان شجاع وكان بيدعي ربه ؟
نطق الشهادة ومد إيده لأجل يحمي صاحبه ؟
أنا عارف إبني عمره يوم ما كان جبان
كان بيمشي في البلد يبدر حنان
وعمره راح لأجل البلد ولأجل ما يعود الآمان
هتوحشني يا بني
***********************************
كلمات الشاعر
** محمد حبليزه **
تحية إعزاز وإجلال وتقدير لكل قطرة دم نزفت من شهيد ..ولكل أب وكل أم وكل أخ وكل أخت وكل إبنه وكل إبن مات لهم في يوم شهيد ..