كنت واقف في الطابور مستني دوري
وكان ورايا أصحابي ماسكين التذاكر
وكل ماييجي جنبي ظابط أبتسم
أصلي لسه منسيتش اللي فات ولسه فاكر
ولما جه علينا الدور علشان هندخل
قالولنا لازم ندخل القفص وفي إيدينا التذاكر
طب يعمل إيه الشاب اللي جاي م الكَفر ودوَّر بس ملقاش التذاكر
يعمل إيه وهو داخ جوه البلد علشان يعرف فين مكان بيع التذاكر
مكنش يعرف إن (منص) أصلا كوش على كل التذاكر
مكنش يعرف إنه مسنود وواصل واشترى كل التذاكر
مكنش يعرف إن قلبه إسود وهينتقم وإنه منسيش البول والقفا ولسه فاكر
وعلشان متكمل خطته أعلن بإن الماتش هيدخلوه من غير تذاكر
فرح الشباب واتجمعوا وراحوا ع الإستاد ماهو الدخول من غير تذاكر
راح ( منص) للوزير إياه واتفق مفيش دخول من غير تذاكر
نفذ قانونك يا وزير واضرب بإيد من حديد واقتل وعور كل اللي جاي من غير تذاكر
وعشان ميكمل الانتقام إضرب كمان حتى اللي جاي ومعاه تذاكر
إعمل قفص علشان متسجن فيه الكل إللي معاه وإللي ممعهوش تذاكر
لكن الوزير نسي إن رجالته مايفرّقوا بين اللي جاي ببلاش واللي جاي ومعاه تذاكر
حبسوا الجميع جوه القفص ودوروا الضرب في اللي جاي ببلاش واللي رافع إيده بالتذاكر
إضرب يا باشا خرطوش واحدف قنابلك إللي ما بتعرف تفرق بين إللي جاي ببلاش وإللي جاي ومعاه تذاكر
وقع القفص فوق رووس الناس مات إللي مات ومنهم كتير إنفعص وتاهت معالم الدم وسط أوراق التذاكر
صرخ الشباب يا خلق إرحمونا وعزة جلال الله ما لقينا أي منفذ للتذاكر
روحنا لرئيس النادي قال لنا أبشروا بكره دخول الماتش بلاش وما بيحتاج تذاكر
طب تعالوا نحسبوها حسبه بسيطه صغيره . كم خرطوش إنضرب وكم قنبله
لو حسبنا تمنهم أعتقد ممكن يعدي كتير أسعار التذاكر
سيبك من الجثث إللي اتبعترت .
سيبك من الأجساد إللي اتكسرت
سيبك من الدموع إللي اتحجرت
سيبك من الأمهات اللي إتدمرت
سيبك من كل دول بس قوللي يا ترى معاليك عرفت تعرف مين معهوش ومين معاه تذاكر
سيبك من كل دول بس قوللي يا ترى معاليك عرفت تلم كل أسعار التذاكر
سيبك من كل دول بس قوللي يا ترى مين عندك أغلى .. الأرواح .. ولا التذاكر
يا حرقة قلبي عليكم يا شباب بلدي
في بلدكم سعركم أصبح رخيص
دمكم أصبح رخيص
لحمكم أصبح رخيص
أرخص حتى من ورق التذاكر
كلماتي
*** محمد حبليزه ***